Ағымдағы жылғы 29 сәуірде Елордадағы «Жұмбақтас» мейрамханада ҚР Президенті жанындағы әйелдер істері және отбасылық - демографиялық саясат жөніндегі ұлттық комиссияның қолдауымен «Отбасым» Ұлттық құндылықтар орталығы «Ұмыт болған ұлттық тағамдарды жаңғырту» атты  акция ұйымдастырды. Іс-шараға ҚР Парламенті депутаттары, іскер адамдар, ғылыми-шығармашылық қауым өкілдері, БАҚ басшылары, ҚР Президенті жанындағы әйелдер істері және отбасылық - демографиялық саясат жөніндегі ұлттық комиссия мүшелері шақырылды. Жобаны өткізуге Бас редакторлар клубы, «Деловой Мир Астана» баспасы, «Жұмбақтас» мейрамханасы және «Рухани даму» қоғамдық қоры қатысты.

Бас редакторлар клубының вице-президенті Шолпан Сыздықованың басшылығымен  «Отбасым» Ұлттық құндылықтар орталығының қоғамның ұясы болып табылатын қазақстандық отбасында дәстүрлі құндылықтарды сақтау бағытында игілікті істерді атқаруда. Өткізілген бұл жобаның да негізгі мақсаты ұмыт болған ұлттық тағамдарды жаңғырту, олардың қазіргі заманға лайықталып дайындалу тәсілімен, дұрыс тамақтану мәдениетімен көпшілікті таныстыру, сондай-ақ осы тағамдарды отбасының және мейрамханалардағы дастархан мәзіріне енгізу болғандығын атап өткен жөн.

Кеш қонақтарына быламық, жаужүрек, үлпершек, көмеш, әсіп, жөргем, сүбе тәрізді жеті тағам түрлері ұсынылды. Қатысушыларға бұл тағамдардың тарихы мен олардың дайындалу құпиялары түсіндіріліп, ұсынылған дәмнен ауыз тиюлеріне мүмкіндік берілді.

Ұйымдастырушылардың айтуларына қарағанда, ұлттық тағамдардың тарихымен етене танысу үшін олар Қызылорда, Жамбыл, Ақтөбе, Оңтүстік Қазақстан, Шығыс Қазақстан облыстарында болып, ата-бабаларымыз мықты денсаулығымыздың кепілі болатын тағамдарды бізге ұлы мұра ретінде тастап кеткеніне көздерін жеткізіп қайтыпты. Мәселен, быламық сәбилерін емізетін жас аналарымызға арналып дайындалған. Бұл тағам бала ағзамына аса қажет кальцийдің мол болуын қамтамасыз етеді. Ал, жаужүрек тағамын ат үстінде жүріп, дала табиғатына бейімделген қойшылар, аңшылар марқа қозыны не киікті, таутекені сойып жіберіп дайындаған. Үй жағдайында қонақ келіп, қой сойылып жатқанда негізгі тамақтың алдында ұсынуға болатын тағам. Жөргем – мал өнімін ысырап жасамауды көздейді. Екінші жағынан ішек-қарынның адам ағзасына аса пайдалы екендігі ескерілген. Жалпы бұл тағамдардың қай-қайсысы болмасын адам ағзасының дамуына әсер етіп, түрлі ауруларға қарсы тұру қабілетін арттырады.

Бір айта кетерлігі, қай облыста болмасын ұмыт болған ұлттық тағамдар дайындаудың тәсілдерін әжелермен қатар жас бойжеткендер де меңгергенін көрсетіпті. Олардың бірқатары осы іс-шараға арнайы келіп, өздерінің ойлары мен пікірлерін ортаға салды және «Отбасым» Ұлттық құндылықтар орталығы тарапынан арнайы Алғыс хаттармен марапатталды.

Ұмыт болған ұлттық тағамдармен таныстыру рәсімнің соңында белгілі қоғам және мемлекет қайраткері, Л.Н.Гумилев атындағы Еуразия ұлттық университетінің ЮНЕСКО кафедрасының профессоры Әділ Ахметов сөз сөйлеп, аталмыш іс-шараның еліміздің болашағын баянды етуге үлкен үлес қосатынын атап өтті және жиналғандардың атынан ұйымдастырушыларға зор алғысын білдіре отырып, «Отбасым» Орталығының алаңында әлі талай игі істерге куә болатынына толық сенетінін жеткізді.