«Қазақстан» Ұлттық телеарнасы жаңалықтар бөлімінің аға редактор-жүргізушісі, «Дарын» мемлекеттік жастар сыйлығының лауреаты Гүлназ Әлімгерейдің мектеп-студиясы алғашқы қарлығаштарына қанат қақтырды.
Осыған орай ұйымдастырылған жиынға «Бас редакторлар клубы» қо­ғам­дық бірлестігінің президенті Кен­жеболат Жолдыбай арнайы ша­қырыл­ды. Ол мектеп-студияның тұңғыш түлекте­ріне салтанатты түрде сертификаттарын тап­сырып тұрып: «Уақыт өте келе, сіздер аға буын өкілдерін алмастырасыздар. Сол себепті қазірден бастап қарқындары­ңыз қатты, екпіндеріңіз күшті болуы ке­рек. Журналистика бір орында тұрмай­ды, үздіксіз дами береді. Бәсекеге қабілетті маман болу үшін сіздер терең білім­мен қарулануға тиіссіздер. Осы жерде жа­дыларыңызға тоқығандарыңыз алдағы уақытта кәделеріңізге жарап, пайда­ла­рыңызға асатынына сенемін. Себебі бұл жерге нағыз хас шеберлер жиналған. Олардың білімі мен білігі сіздерге өмірлік азық болады» деді. Шынында да, мектеп-студия отан­дық журналистиканың корифейлері мен осы салада қолтаңбасын қалыптастырып үлгерген журналистерді жинап алыпты. Олардың қатарында Ғ.Шалахметов, Н.Ома­шев, Н.Мұхамеджанова, Р.Аман­жо­лова, А.Үкібай, М.Манатбек, З.Әліп­бек, Л.Сұлтанқызы, С.Аббас-Шах, М.Са­дық, Л.Танысбай және О.Петерс бар екен.
2 айлық курсты аяқтаған 15 шәкіртке Н.Иманғалиұлы, С.Жақанова, Б.Секер­баева, Н.Ораз, П.Мырзахмет, Шолпан Ғабдолмуллинова сынды мамандар дә­ріс оқып, тікелей эфир мәдениеті мен ток-шоу һәм реалити-шоу жүргізудің қыр-сырын меңгертіпті. Сонымен қатар сце­нарий жазу мен сұхбат алудың тәсілдерін үйретіп, сөйлеу техникасын қалып­тастырыпты. Мектеп-студияға жоғары сынып оқушылары мен тележүргізушілікке икемі бар, жаза білетін талапты жастар қа­был­данған. Оларға еуропалық стандартқа сай білім берілген. Дәріс дәстүрлі түрде емес, түрлі жаттығулар мен қызықты ойын түрінде өткен. «Біз тележурналистика саласына қа­тысты барлық мамандарды даярлаймыз.
Оқу бағдарламасын толық меңгер­гендерге сертификат беріледі және жұ­мысқа тұруға ұсынысхат пен тәжірибелік оқытудың иллюстрациялық материал­дары табысталады. Осылайша бітіруші­лер өз қабілеттерін отандық телеарналар­да таныту мүмкіндігіне ие болады» деді бізге Г.Әлімгерей.
Оның айтуынша, мектеп-студия заман талабына сай бәсекеге қабілетті маман даярлауды және қалыптасып келе жатқан жас журналистердің кәсіби шеберлігін шыңдауды көздейді.
«Мектеп-студиямыз отандық теле­арналармен тығыз қарым-қатынас жа­сайды. «24 kz» арнасында мектебіміз­дің шәкірті Алмас Тоғай «Қырағы көз» және «Все на виду» бағдарламаларын қа­зақ, орыс тілдерінде жүргізеді. Қыздары­мыз түрлі кастингтерге қатысып, бақта­рын сынап жатыр. Шәкірттеріміз тәжірибе­лік сабақта «Қазақстан» Ұлттық арнасы­ның жаңалықтар бөлімінде болып, түсіру алаңын көзбен көрді. «Хабар» арнасының «Біз» және «Орталық хабар» бағдарла­маларына қатысып, пікірлерін ортаға салды» деді танымал тележүргізуші.
Мектеп-студия Астанамен шек­тел­мейді. Ол тұтас республиканы қамтиды. Сертификатқа ие болғандардың ара­сында Қызылорда, Семейден келген қыз­дар да бар. Семейлік Динара Со­ветханова ай­тыстың алдын бермей жүрген ақын Сара Тоқтамысованың сіңлісі екенін жеткізді. Ал қызылордалық Айдана Әлиарыстанова Астанада 2 ай тұруға тиіс болғанына қа­рамастан «Гүлназ Әлімгерейдің мектеп-студия­сында білім аламын» деген ойынан ай­нымағанын айтты.

http://www.aikyn.kz/articles/view/25523