Мәдениет және ақпарат министрлігінің қолдауымен «Бас редакторлар клубы» қоғамдық бірлестігі «БАҚ және мемлекеттік органдар қарым-қатынасын жақсарту» деген тақырыпта журна­листерге арнап семинар өткізді.
Баспасөз қызметкерлерінің алдын­да «Бас редакторлар клубының» президен­ті Кенжеболат Жолдыбай, «Жетінші арна» телекомпаниясы бақылау кеңесінің төрайымы Бибігүл Жексенбай, Қазақ радиосының директоры Махат Садық және халықаралық ақпарат акаде­миясының корреспондент мүшесі Сәуле Әшенова сөз сөйледі. Олар Мемлекеттік хатшы Марат Тәжиннің масс-медианың кадрлық әлеуетін арттыру туралы тапсырмасы жур­налистерге зор жауапкершілік жүк­тейтінін жеткізіп, қазіргі ақпараттық заман тілшілерге әмбебап болу талабын қойып отырғанын баяндады.
Семинарда Б.Жексенбай журна­лист билік пен халық арасындағы алтын кө­пір. Ол қоғамдық пікірдің қалыптасуына тікелей ықпал етеді. Бәсекеге қабілетті болу үшін тілшілер техниканың тілін мең­геріп, ақпарат берудің түрлі тәсілдерін қолдануы керек деген пікірдің жетегінде болды.
С.Әшенова: «БАҚ пен мемлекеттік ор­ган­дардың қарым-қатынасын жақсар­ту үшін баспасөз хатшыларының кәсі­би біліктілігі мен ішкі мәдениеті мықты болуы тиіс. Олар өздері­нің әріптестері­мен тонның ішкі бауындай арала­сып, тиісті ақпаратты дер кезінде беріп отыруы керек», – деді. Ал М.Садық: «Ақпарат ұшқыр­лығын, дәлдігін нақтылығын жо­ғалтпауымен қатар тыңдарманның, кө­рерменнің және оқыр­манның сұраны­сын қанағаттандыруы тиіс. Жа­ғымды жаңа­лық қазақстандықтардың көңіл күйін қалыптастырады. Өмір сүруге, алға ұмты­луға түрткі болады. Сондықтан журна­листер бұқараға нені, қалай ұсыну қа­жеттігін тап баса білуі тиіс. Адамдарға не болса соны жеткізіп, сананы улауға болмайды», – дегенді алға тартса, семи­нарды қорытындылап, қатысушылар­ға сертификат тапсырған К.Жолдыбай: «Біз қазақтың мүддесі үшін жұмыс істеуіміз керек. Сенсацияшыл болу, тырнақ астынан кір іздеу, түймедейді түйедей етіп көрсету журналистерге абырой әпер­мейді. Бізге салқынқандылық, сабыр­лық қажет. Отқа жүгірсек, өзімізді де, өзгелерді де күйдіреміз. Бүгінгі масс-медианың бағыты бөлек, қар­қыны қатты. Соның екпініне шы­да­ғандар ғана ақпарат айдынында еркін жүзетін болады», – деді.